Liebe Oma! Wir woin DANKE sogn für de schöne Zeit, denn de kau uns kana nehma! Oma dei Markenzeichen woa a Kleiderschiazn. Woam is woan und du host das scho auzogn. Aun an Samstag host oft gsogt: „Drah ma bitte d’Hoa ei, weil i geh am Abend in Kircha, bis dohi werns e drucka, owa dua ma a Kopftiachl drüwa.“ In da Stubn auf da Couch bist meistens gsessn, host Rätsel aufglöst, gschaud wie vü Leid das im Hochhoiz spaziern gengan und nembei is da Fernseha eigschoit gwen. Dei Gwandl samt Schmuck und Schal hod imma zaumpasst und waun ned, daun bist eikafa gfoahn. Do host dei braune Blumenhandtaschn zaumpockt und woast dahi. Ob bei an Besuch, ana Taufe oder an Geburtstag, a Sackerl mit wos Siaßn für deine Enkerl host oiwei mitgnumma. Und waunst gwusst host, dass du Besuch griagst, woa sowieso glei olles gricht. Bei de Seniorenausflüge bist gern mitgfoahn und host oft a Kleinigkeit mitgnumma. Waunst zum fuat foahn oghoid woan bist, woast sicha scho a dreiviertel Stund vorher fertig. Gfreid haum se olle jedes Joah auf deine guadn Schniakropfa und Mostkeks. Des Schniakropfa Rezept woa da wichtig, dass des weitergebn wird, so wiast das du ah oiwei gmocht host. Z’Weihnachten ban Beten woast oiwei schneller ois wia, mit dein Tempo. Des hod dir a oiwei gfoin und woa dir a wichtig, dass de ganze Familie zaumkummt. Auf deine Kinder und Enkelkinder host bis zum Schluss imma gschaut, dass uns guad geht. Ba jeden Zeugnis, bestandenen Führerschein, jeden Erfolg im Leben woast Stolz auf uns und hoist oiwei gsogt „Des schaffst scho“! DANKE Oma für olles! Du wiast imma an Plotz in unser’n Herzen haum! Vergiss uns ned! Haum die gern! Manuela, Claudia, Lukas